Foto: Sý resýrstary jáne ırrıgasııa mınıstrligi
Sala mınıstrliginiń málimetinshe qazirgi ýaqytta 11 toptyq sý qubyryn jergilikti atqarýshy bılikke berý jumysy jalǵasyp jatyr. Onyń 9-ynyń qujattary Memlekettik múlik jáne jekeshelendirý departamentterinde. Jalpy sany 41 toptyq sý qubyryn ákimdikterge berý josparlanyp otyr.
Jergilikti atqarýshy organdardyń kommýnaldyq ınfraqurylymdy tikeleı basqarýǵa qajetti ókilettikteri men quraldary bar. Olar tarıfterdi bekitedi, bıýdjet qarajatyn bóledi, sondaı-aq paıdalaný men qaıta jańǵyrtýǵa ketetin shyǵyndardy jergilikti jáne respýblıkalyq baǵdarlamalarǵa engize alady.
Toptyq sý qubyrlaryn ákimdikterge berý – jelilerdi júıeli túrde kútip ustaý men jóndeý arqyly apattyq jaǵdaılardy azaıtýǵa múmkindik beredi. Sonymen qatar bul shara shyǵyndardy naqty ári ashyq esepke alýǵa, bıýdjet qarajatyn tıimdi paıdalanýǵa jol ashady, sýdyń ysyrabyn azaıtady jáne júıelerdiń energııa tıimdiligin arttyrady. Odan bólek, sıfrlandyrý men avtomattandyrý úderisin de jedeldetedi. Nátıjesinde, turǵyndar taza aýyzsýǵa turaqty ári úzdiksiz qol jetkizedi. Bul – sý salasyndaǵy memlekettik saıasattyń basty mindetteriniń biri.
«Sonymen qatar mınıstrlik 1,3 mln adamdy aýyz sýmen qamtamasyz etý úshin uzyndyǵy 2,5 myń shaqyrymnan asatyn sý qubyryn salý jáne rekonstrýksııalaý jumysyn júrgizip jatyr. Búginde 9 oblysta 31 joba iske asyrylyp jatyr. 2024 jyly Aqmola, Almaty, Qyzylorda, Soltústik Qazaqstan, Mańǵystaý, Ulytaý oblystarynda 8 toptyq sý qubyryn salý jáne rekonstrýksııalaý jobasy aıaqtaldy. Bul jumystar 208 myńnan astam turǵyny bar 49 eldi mekenniń aýyzsýmen qamtý jaǵdaıyn jaqsartýǵa múmkindik berdi», dedi Sý resýrstary jáne ırrıgasııa vıse-mınıstri Erbolat Ibraıhanov.
